الي بمشي على الشوارع في البلاد ياما بشوف, بس اشي زي الي كان الصبح في البلد ما شفت, قمة الاستهتار في حياة اولادنا , استهتار بدون حدود.

كنت في طريقي لمدرسة المستقبل اوصل ابني , وكعادتي اني اعطي حق الأولوية دائما للمشاة وبسوق السيارة باقل من مهلي لانو ما في شي اهم من حياة اولادنا, وقفت عند ممر مشاة كانت واقفة جنبو بنت صغيرة , البنت نزلت عالشارع , طبعا على ممر المشاة الي بيعطيها كل حق الأولوية , لما صارت تقريبا بأخر سيارتي ولولا ستر الله وانتباهها هي البنت! لحصلت كارثة ,سيارة مستعجلة مبين حاطة الطبخة على الغاز يا ناسيي اشي في الدار او بتحكي في التلفون او مش عارف شو , طلعت من وراي وقطعت على البنت الصغيرة الطريق ولوا انتباه البنت كانت دهستها.

المشكلة الي وراها كمان بدو يتحركو بدهم يلحقوها بدون اي اهتمام بممر المشاة الي هو مخصص يا ست يلي في السيارة لابني وابنك.

السؤال هو : كيف ناس زي هاي بيوخذو رخص سواقة ؟ وهل ممنوع او عيب ننتبه للقوانين داخل البلد وهل في شي اغلى من حياة اطفالنا الي على الشوارع ؟ واذا ما انتبهنا بكل حواسنا على الشوارع على قولت العجايز "نطم حالنا ونقعد في البيوت".

للاحساس في الموقف الي كان حبيت احط الفيديو من تسجيل كاميرا السيارة بلكي السائقة وغيرها ممن لا يراعو حرمات الشوارع يراجعو حالهم ويعيدو حساباتهم ويسوقو بحذر قبل وقوع كارثة لا سمح 

الله 

والله الموفق